बार्शिटाकळी तहसीलदारांची मस्ती! राष्ट्रगीताचा अवमान करून पत्रकारांशी 'उद्धट' वर्तन; कारवाई होणार की पाठीशी घातले जाणार? -: श्याम ठक

बार्शिटाकळी तहसीलदारांची मस्ती! राष्ट्रगीताचा अवमान करून पत्रकारांशी 'उद्धट' वर्तन; कारवाई होणार की पाठीशी घातले जाणार? -: श्याम ठक

बार्शिटाकळी प्रतिनिधी श्रावण भातखडे 

बार्शिटाकळी :- प्रजासत्ताक दिनाचे पावित्र्य राखण्याऐवजी बार्शिटाकळी तहसील कार्यालयात प्रशासनाच्या बेजबाबदारपणाचा कळस पाहायला मिळाला. ज्या राष्ट्रगीताने भारतीयांची मान अभिमानाने उंच होते, त्याच राष्ट्रगीताचा अवमान स्वतः तहसीलदार रवींद्र कापशीकर यांच्या उपस्थितीत झाला. राष्ट्रगीत अर्धवट वाजवून त्याचा अपमान तर झालाच, पण यावर जाब विचारणाऱ्या पत्रकारांशी तहसीलदारांनी एखाद्या मुजोर नेत्याप्रमाणे अर्वाच्य भाषेत हुज्जत घातल्याने संपूर्ण जिल्ह्यात संताप व्यक्त होत आहे.

नेमका प्रकार काय?

आज २६ जानेवारी रोजी तहसील कार्यालयात ध्वजवंदन सोहळा आयोजित करण्यात आला होता. मात्र, प्रशासनाच्या नियोजनशून्य कारभारामुळे राष्ट्रगीत गाण्याऐवजी 'युट्युब'च्या जीवावर सोहळा उरकला गेला. तांत्रिक बिघाडामुळे राष्ट्रगीत अर्ध्यावरून सुरु झाले. नियमानुसार राष्ट्रगीत पूर्ण होणे बंधनकारक असतानाही, ते पुन्हा पूर्ण न करता राष्ट्रगीताचा अपमान करण्यात आला.

तहसीलदारांचा पारा चढला!

कार्यक्रमानंतर उपस्थित सजग पत्रकारांनी प्रोटोकॉलच्या भंगाबद्दल तहसीलदार कापशीकर यांना विचारणा केली. आपली चूक मान्य करण्याऐवजी कापशीकर यांनी आपला संयम गमावला. उपस्थित मान्यवरांसमोर पत्रकारांना अपमानित करणारे हातवारे करत त्यांनी उद्धट उत्तरे दिली. एका जबाबदार पदावर बसलेल्या अधिकाऱ्याला लोकशाहीच्या चौथ्या स्तंभाचा सन्मान राखता येऊ नये, हे प्रशासनाचे दिवाळखोरपण असल्याचे बोलले जात आहे.

प्रत्यक्षदर्शींनी मांडली व्यथा

यावेळी उपस्थित असलेले ज्येष्ठ नागरिक केशव सुखदेवराव राऊत यांनीही संताप व्यक्त केला. त्यांच्या समोर एका व्यक्तीने मोबाईलवर तीन वेळा राष्ट्रगीत सुरू-बंद करून थट्टा मांडली होती. विशेष म्हणजे, दरवर्षी निमंत्रण मिळणाऱ्या सन्माननीय व्यक्तींना यंदा डावलण्यात आल्याचेही समोर आले आहे.

आता प्रश्न कृतीचा!

या घटनेची तक्रार झाल्यानंतर पालकमंत्री आणि जिल्हाधिकाऱ्यांनी तातडीने कारवाईचे आदेश दिले आहेत. मात्र, केवळ कागदी घोडे नाचवले जाणार की राष्ट्रगीताचा अपमान करणाऱ्या आणि पत्रकारांशी गैरवर्तन करणाऱ्या अशा अधिकाऱ्यावर निलंबनाची कुऱ्हाड कोसळणार? याकडे आता सर्वांचे लक्ष लागले आहे.

"राष्ट्रगीताचा अवमान सहन केला जाणार नाही. तहसीलदारांचे वर्तन हे लोकशाहीला काळिमा फासणारे असून त्यांच्यावर तात्काळ कठोर कारवाई व्हावी, अन्यथा आंदोलन छेडले जाईल."

— स्थानिक पत्रकार संघ, बार्शीटाकळी